قصيد نبطي مميز في الغزل


قلبي معك

أشتقت لك يلي على البال مريت
                           وجلست أفكر فيك من غير لدري


حاولت أسلي خاطري عنك وأزريت
                        قلبي معك مشغول لو قلت مدري

أنت الوحيد اللي من الناس حبيت
                         وأنت الذي شوقك مع الدم يجري

تدري وش اللي حد قلبي وغنيت
                        ومن سبته ضيعت عزمي وصبري

أنك معي بالحب ماقط زليت
                           ودايم على رايي وظني وخبري

مهما كتبت أمن القصايد وسويت
                        ومهما طرالي في خيالي وفكري

ومهما بحبك بالمعاني تماديت
                             ماقدر أعبر ماطرالي بشعري

من بعدكم لانيب حي ولاميت
                          عايش ولد العين في جال قبري

في خاطرك كلمه وأنا فيك حسيت
                                بقولها لك وأنت خابر وتدري

أعاهدك بلي رفع رايت البيت
                   ما خون حب عاش في وسط صدري

بجيك كلي غلا

تبي الصراحه تراني صدق حبيتك
                 وأحترت وشلون أعبر لك عن اشواقي

تبيني اسكت سكتت وما تناسيتك
                   ألا متى أسكت سكت ولا بقى باقي

يابعد هالناس انا من قلبي اغليتك
                  حبك جرى بالعروق وعاش باعماقي

اي والله اغليك صدق وكم تمنيتك
                 تروي ليال الظمى لو خاطري ضاقي

بجيك كلي غلا وان كان ماجيتك
                      ابنتظر جيتك لي واكشف اوراقي

انا على موعدك ياما تحريتك
                      ياللي بلقياك يفرح قلبي الشاقي

مابين جفني وبين العين حطيتك
             غب عن عيوني مادامك تسكن احداقي

لو تطلب الروح قلت أفداك واعطيتك
                    مادام قلبي معك .. لاتطري فراقي

عليك اسلم واذا رديت حييتك
                      تحية فيها أعبر لك عن اشواقي

ام العيون السود

نـبـع العـذوبـه دونـه البـاب مـوصـود
                       إلا عـن اللـي لاوزنـهـا .. وزنـهـا

اللي يجيـب من البحر لـولـو عقـود
                   كـل المـوانـي جهـزت لـه سفنـهـا

حتى لو ان الدخل ( ملـوي و محـدود )
                    المـزمـنـه يـكـوي جـروحـه زمنـهـا

فـز الـربيـع وجـابـت علـومـه النـود 
                   والأرض ربـي.. بـالخـزامـا.. دفنـهـا

وام العيـون السود ورمـوشهـا سـود
                   تبي تربـع مـن وطنـهـا .. بـوطنـهـا

البـارحـه بـالليـل مـاعنـدي شهـود
                   من صـحـة لساني لصـحـة بـدنهـا

تطرب واغني..واسكت وتطلبـ( ن ) زود
                  وابعـث "رميـم القافيه "من كفنهـا

اذبحلهـا معنـى لـه سنين مفـقـود
                   اللي ذبحتـني ذبـح ماتـدري انـهـا

عليهـا ضحكه كنـهـا دنـدنـة عـود
                  وشلـون اسولـف للعصافيـر عنهـا

اقـول( ضحكة طفل ) قبل امس مـولـود
                   ولا البنـات وهـن بنـات عشقنـهـا

على ملامـح وجههـا الملـح مجـرود
                  وكـل مـاتمـر الـزعفـران يحضنـهـا

ماكن ( دهن العـود )..معها..( دهن عـود )
                  العــود اضنه يـاخـذ الدهـن منـهـا 

على صباحه مطلـع الشمس معـقـود
               وجـدايلـه (( ليل الشتـا )) طاولنهـا

ماللسواد بديـرة عيـونهـا حـدود
                 غيـر العيـون الـرمش يآمــر وينـهـا

ومتلثـم الرمـان ( عنقـود )..( عنقـود )
                مـديـت لـه عينـي وكفـي سجنـهـا

حتـى النحـل لـو جبت لـه بـاقـة ورود 
               راح لـ..شفايفـها الـرقيقـه وسكنهـا

والسالفه تضحـك وانا كنت مـوجـود
               ماتـدري ان "الشعـر" يدفـع ثمنـهـا

اروح اعبي بـ..القلـم ملـح بـارود
                و انشب بحلـق القافيـه وامتحنهـا


تولعت بك

تولعت بك والله كتب لي على فرقـاك
                         حسبي على الحظ الردي كانه أشقاني
أنا ما شعرت أني مع الناس قبل ألقاك
                                 ولا ذقت للدنيـا طعـم قبـل تلقانـي
ولا كنت أحس بلوعة الحب قبل أهواك
                               ولولا عيونك ما كتبت أجمل ألحانـي
سقا الله ليال خالده عشتهـا وايـاك
                                بدرب الحوية بين عشـب وغدرانـي
تذكرت يوم أقبلت كنك تحسب خطـاك
                                    تمايل بعـود نايـف الطـول ريانـي
وترفع طرف ملبوسك الضيق بيمنـاك
                               وشلال شعرك تنثره فـوق الامتانـي
ترى اللي يسليني عن مشاهك ذكـراك
                           أنا مستحيل أنساك أخاف إنت تنساني

سعود بن بندر

ودي بك

ودي بك .. وابيك واباك وابغاك
                     جمعتها لرضاك واختار فيها 

شف ويش منها يتبع احكاك ورضاك
       واللي لك اسقي مسمعك لا ضميها 

غديت اقرا حكاي واساير احكاك
                    وانا تشرف لكنتي واهتويها 

مضمونها ودي بشوفتك واهواك
             ياللي دروب اهل الردى ما تجيها 

صانك ولي امرك وحبك وداراك
                      لاقدر ردع الحظوظ ومجيها 

نفسك مهذبها وعز الله رباك
                مايدري ان جيش الهيام يغزيها 

والله قسم يبلاك بي وانت يبلاك
             باللي سواتي في العرب يرتجيها 

محبة ذربه من القلب تكساك
                   محبة صدق الهوى يكتسيها 

يامرك قلبك بالوفا لي وتنهاك
                   ناس على لاماك تفرك يديها 

رزين عقل ومن مزايا مزاياك
                 نفسك تحب وعفتك تمتطيها 

وتطيع عقل ما بعد زل واغواك
                 مشاعرك تعصاه وانت تعصيها 

ماشفت منك الا عيونك ويمناك
                       محبة راع الردى ما يبيها 

يقبض فوادي لا تخيلت فرقاك
                  ياشف عين ما سواك يعنيها 

وياعزوة اخوانك ومطلب هذولاك
                     ناس محبة والدك تدعيها 

ناس تخدم ابيك كله لعيناك
          وهو يحسب ان الله عليه يهديها 

ياجعلها تفدى على الارض ماطاك
                    والله بمن هو مثلها يبتليها 

لكن لعب في ياوليفي تغلاك
         ونفسي غلاك من الصدود يحديها 

تبطي علي وانا هنا واتحراك
             وكبدي لواهيب الصبر تشتويها 

اجمع علومك امن هناك وهناك
             والله لو انها تنشرى لا اشتريها 

وعذرك انا لاهي يا ويش اللي الهاك
                  لاهي ومرمنت لاهي تليها 

كانك مشكك في الوفا والغلا هاك
                جوالي اقر القائمه كل ابيها 

رقمك مع الصادر ولا وارد اسواك
            والناس في اللي لم يرد عليها

واياك واياني...واياني اياك
             من غيبة من دون عذر يحميها

ابن فطيس

حظ الحمامة 

حظ الحمامة تلقط الحـب وتحـب
                    شفـة فتـاة ربهـا اللـي قبلهـا 

بنت صغيرة تاخذ العقـل والقلـب
                  تلعب مع فـرخ الحمامـه وتلهـا

جاها الغريب وقال يا مطعم الحب
                  أطعم غيور غيرته مـا احتملهـا 

واقفت لاهلها تلعن الطير وتسـب
                 ما ادري زعل ولا غضبها زعلهـا 

هذا وأنا لانـي متيـم ولا صـب
                لاشك روحي غردت مـن هبلهـا 

والروح لا طربة ترى مالها طـب
                   غير القصيـد اللـي يـروح مللها 

والقلب لا شاف التعاجيب يعجـب
                  والنفـس عيـت لا تخلـي زللها 

والعين صدتها عن الزين تصعـب
                  وأنا ادري انه ياملا مـن جهلهـا 

ياهل الجماله خبرو حلـوة النـب
                 اللي حمام الورق يهـوا غزلهـا 

قولو لها ليه اهل الهوى مالهم رب
                 لا جاوروهـا تشتكيهـم لاهلهـا

خالد سعود الكبير

تكرم البسمة 

تكرم البسمة اللي منك تكفيني
                      كيف أناديك عمري والعمر فاني

كل شي خلق بك لك يناديني
                        إنت غير الجميع ولك غلا ثاني

قلت أبذكرك وأثرك ساكن فيني
                         بين عيني وعيني ما تعداني

انت تبخل بك يساري عن يميني
                    ىآه يا ليت تدري منك وش جاني

ليه لا قلت أشوفك وإنت بتجيني
                 جاك قلبي يسابق خطوة لساني

من سلامك نبت في راحة يديني
                    ألف غصن يميل من الغلا حاني

قبل تسأل من اللي لك موديني
                       انت وديتني والشوق وداني

سعود بن عبدالله
ــــــــــــــــــ

الحب عظم صورتك في خيالي
                  ولا أنت ميت قلب ماعندك أحساس

توني عرفتك بالليالي التوالي 
                   سود الليالي تكشف الناس للناس

الحب زين صورتك في خيالي 
               صورة جميلة عكسها فقد الاحساس

تكذب علي في قولك اني لحالي 
                    واني غديت بداخلك مثل الانفاس

واتقول حبك فاق وصفي وخيالي 
                 وغيري كثير الي سمعها من الناس

صحيح حبك غلطة في الي مضالي 
                    جرحت قلب تعرفه حيل حساس

بعرفك سود الليالي التوالي 
             الي اكشفت مثلك من الناس اجناس

وان كان قصدك رجعتي ماطرالي 
               مثلك ترى قدره على الارض ينداس

علي القحطاني

صد وزعل

بصفه , يوقف , وهو , قلبي
                   قلبي وهو قلبي يوقف بصفه

صد وزعل لا وحلالاه يارضاه
                   لا واهني اللي يعرفون شفه

مدري وش اللي مزعله لا عدمناه
                      حلف ولكن ماوفا لي بحلفه

أنا أشهد انه حد قلبي على أقصاه
                  ولف تمكن واسرف بحال ولفه

عنده خبر ماني بعايش بلياه
                      قلبي معه لا قال الفه الفه

حتى ولو يجفا أنا ماأقدر أجفاه
                لا عب قلبي لعب لا عاد عرفه

والمشكل اني لا تعاندت وياه
                قلبي وهو قلبي يوقف بصفه

خالد المريخي